爸爸走了後

爸爸去年聖誕時被說入院急救. 而我, 1月初帶著bb回港, 住在娘家, 以為幫輕媽媽家務又可探爸爸. 3月3, 爸爸走了. 回想這2個餘月, 我感受甚多...

由於要照顧bb同外甥們, 平日很難跟家人一起探病, 每次都是一個探完回來另一個過去. 開頭爸爸說話有氣有力還駡人, 但身體明顯不好, 天天出血, 經常輸血..初時我心裡還不高興, 因他不理睬來探訪的我們, 於是有時以忙照顧小朋友為由而隔天去探望. 那段時間, 每天生活真的"充實", 週末有老公陪伴就輕鬆些. 我常以為此次回港是犧牲女兒的發展進度來探望爸爸. 

其實我跟爸爸不太親, 沒什麼話題, 生了女兒更是對他疏忽, 探病時都少說話. 後來, 他情況差了點, 經常喊痛, 我就幫他按摩腳, 他問我這樣做手累不累, 我說不. 然後, 我走時, 他握我的手一會. 就這一握, 感覺大家親近些, 往後我來探他都會做按摩. 

2月時我搞文件申請老公來港定居, 月尾有文件給爸爸簽名, 可他手不靈活簽不成, 後來用了手指模. 打完指模, 我幫他剪手指甲. 那天, 他還有回應我. 過幾日, 我探他時, 他頭出很多汗, 叫極沒反應, 眼不睜開. 等我跟護士說, 護士看他才有反應. 那時, 我心知不妙..數天後, 他便走了, 不曾留下片言隻字給我們.

我是有點內疚去年知道爸爸病情時沒有多關心他, 那時我在著緊女兒...

家人決定做法事. 頭七做了, 出殯大殮火化了. 那兩個星期我不時想起爸爸, 應該是正常反應吧. 現在, 我的生活回復全面照顧女兒. 幸好, 她身體開始有明顯進步, 作息時間固定, 我就多了私人空間---開始追劇, 看"星星", 擁抱太陽到主君太陽. 之前還會弄麵包, 稍後應會再做, 因麵粉還有. 4月會回澳門住一個月, 之後去新加坡旅行. 我需要放鬆一下!

1年了

今日是我們結婚2週年, 但我們分隔兩地, 為的是帶bb來港應3個診. 自bb出世, 所有紀念日子都不特別了, 什麼都以bb行先, 記住的都是覆診日期.
老實說, 這不是我當初所想的產後及婚後生活, 奈何...
去年10月28我生日, 由於bb已過預產期還未有動靜, 過多兩日就"逾期居留"要入院催生, 但我想老公陪入院, 所以決定深夜入院 (當然要有"生產先兆"). 在醫院見紅了, 但還未開, 最後, 醫生說我身體可以做催生就進行了. 那13小時簡直畢生難忘, 钩穿, 落藥, 痛痛痛最後要求止痛針但"一度都無"!結果要緊急開刀, 10月30零時xx bb出世了, 我哭了一點, 接著就是從沒想過的事...
人說開刀後要多休息不要急於落床, 但為了探訪在special care房的bb, 我躺了約8小時便起床.
bb最後診斷為MCMRH, 在香港醫護記錄只有5個同類case (真夠榮幸嗎?). 她早前動了個手術, 現在發展遲緩但有進步, 每個月都會回港覆專科診和做物理治療, 澳門都有專科跟進, 但以香港為主. 希望再大點能減少到醫院次數.
在出世時, 我已接受事實 (出奇地). 開頭過於集中她的奶源, 好想全人奶, 可惜, 自身與環境因素擾亂了, 家人還以為我有抑鬱病, 最終在她食固體後才成功. 除非身體不許可, 我會一直餵到她自然斷奶. 我已經沒有給她正常身體, 我只能給她如血般珍貴的母乳作補償.
除了bb的事, 我住了2個地方"坐月", 不同人陪月, 老公在我復工前辭工幫忙照顧bb, 我完了產假就辭職, 要搞澳門居住, 是有點忙. 老公跟我一起照顧bb 4個多月才返新工, 我是很感激他對我一直的支持. 終於, 我們有自己的家, 是一起生活的家.
現在, 生活算是穩定下來, 家務都能應付, 有時還可以弄糕點, 我早感到照顧bb有點悶, 但還是不放心假手他人而出外工作, 還是等多一會吧.
雖說穩定, 但因為要同bb每天運動鍛鍊而令她失去跟外界接觸機會, 她現在不懂跟陌生人甚至小孩溝通, 對遊樂場設施不感興趣, 希望日後大改善啦.
萬幸是她愛笑, 將來定可笑著面對任何事.

"前二"假的第十天

由10月10開始放產假,第一個星期在整理物品. 第二個星期開始每天散步又做運動, 但還未有聲氣...只能說我陀b陀得好好~~
上週末發現有人無通知就黎睇我地租果個單位, 好唔高興! 打畀業主話check check, 後來我地查到係業主無收返放喺間大地產既keys, 咁我地通知業叫收返啦, 希望無再煩我地啦, 我地租到11月尾架, 使乜咁早睇樓仲要唔通知 @@...
10月15去屯門醫院產檢, 上星期驗尿無事. bb頭仔再入左d但醫生話一日未生未係完部入晒. 講左等於無講!
見身體狀況還穩定, 就去尖沙咀咀出席早前報名的雀巢產前講座. 內容ok, 但無講產後護理, 而示範又好趕咁. 禮品就如網上blog所言有沖涼lotion旅行裝/sample, 果汁, 燕麥片, 口水肩, 紗巾同尿片sample.
至上星期飲了3劑清胎毒湯水, 今個星期日日行超市, 終於尋日買到個甜爽西瓜, 正呀! 希望真係有催生作用...
bb, 爸爸媽媽好想見到你呀, 快d出黎啦!

為未來新生活而幹的事(下)

7月14 聽第一個講座---分娩止痛方法+產前產後情緒
umm,  第一部份有用, 我想聞笑氣唔掂先無痛分娩.不過都要睇當時入院情況, 好快順產就唔使搞咁多啦^^
7月16 返工途中, 架車焗焗地, 個人唔舒服, 飲左d咸柑桔水好d喎, 應該頭暈作悶索salt好過糖. 仲係著緊未大肚既衫, 今朝無著外套喺公司行, 有同事見到就驚訝於我的大肚子~我懷孕消息應該全公司知喇.
照鏡覺得肚子大左唔少, 臀部更勁, 手臂未變, 好彩. 我想bb吸收多d, 淨個肚大就得!
7月21 喺澳門漁人碼頭有個bb用品家居同電子展, 一睇無妨. 當日好曬, 有唔少人排隊, 孕婦同bb可直接進場. 論規模, 當然比香港的細, bb東西都不夠10個攤位. 唔記得香港同牌子同款價格, 齋行一圈就走了.
7月22 颱風起, 坐船到中港城都頗大浪, 隔我2行個操普通話女士, 開船無耐就嘔, 直到停船! 我慶幸多年嘔吐次數10次不到, 但腹瀉呢.....
當晚12點後才瞓, 睡前去洗水間有點問題, 走了2 round, 第2round 出小便時, 感覺不同, 如噴泉湧出液體. 當沖廁時一看, 嘩, 馬桶係血水!!! 驚慌下, 走出門同家人說, 即時換衫拿銀包雨傘外套就落樓等的士去急症室.
以為喺急症室等檢查, 無諗過直上婦產科入院觀察, 乜野都無帶, 電話未增值無帶添!
換醫院衫時又去洗手間, 今次血尿更紅, 個人更擔心及茫茫然...
凌晨一時喺醫院床等醫生初步講解之後有咩檢查, 之後等抽血, 留小便, 當然睡不好, 還哭起來, 深怕對囡囡都什麼影響, 也不想她提早出世...
7月23 早上9點多醫生來了, 之後做了超聲波和婦科檢查, 胎兒胎盤正常, 而我又無其他痛楚. 尿液種菌需時1星期, 現在食抗生素.
他請了半天假, 3號波下坐船來探我, 黃昏就8號了, 深夜還上到10號, 真恐怖!
7月24 早上10時改掛3號波. 醫生11時巡房. 我食了抗生素, 自昨天下午無血尿情況, 其他檢查ok, 可以下午出院, 但要繼續食抗生素6天, 呢隻不會影響囡囡的. 下星期二剛好有之前腦室大的覆診, 那一併跟進這病. 若果我再有出血, 兩邊腰側痛, 穿水見紅就要即回醫院 (應該不會!).
病情受控制, 心情放鬆了不小, 但究竟如何出現血尿, 無醫生答我成因, 只說孕婦容易受感染.
這次住在婦產科, 見識不少. 原來不是見紅出血就直去產房, 未開夠度數要待在這產前房, 有監測儀放在肚上. 有位太太41週3都未有動靜, 再遲就要催生. 聽到醫生說第一胎陣痛起碼12小時才生得. 那晚我對面有位太太就不斷呻吟. 但其實幾痛都唔好叫, 應該深呼吸舒緩, 免浪費體力. 所有同房太太都超過35週, 我這個26週跟她無得比較, 我更因擔心無心跟她們搭訕, 只有"偷聽". 哈哈
幸好, 病假有4天, 出面還風風雨雨, 都不想返工.
住了1.5天, 只食醫院餐, 無其他補充, 感覺瘦了. 要在家好好休養食多點!
7月28 第2次去醫院聽講座: 初生嬰兒常見問題+準父母的角色. 講出世後會有咩病, 有d係短暫性, 有d就幾恐怖, 要醫生跟進. 講者都係照稿讀咁, 無乜特別. 做父母既, 唔好咁大壓力, 要大家一齊面對照顧bb.
7月30 呢日係例行產檢, 跟進bb腦室size同入院單野. 醫生話種菌無發現, 不過建議再驗一次. 我問使唔使再食抗生素, 係咪早產機會大d. 醫生話種菌無事就唔使食抗生素, 早產係有可能既. 總之有咩事就即入院.
8月4 第3次聽醫院講座, 今日都唔少人, 因為關於產後護理+初生嬰兒護理? 平時2小時, 今日好似趕住咁姑娘講得勁快, 睇埋片(10幾年舊片, 真係環保) 剛好1小時, 有本書仔拎返去睇都ok.
8月5 自上次出事, 我覺得個人衛生要做返好. 其實直到而家都無買過大size un un, 覺得未懷孕時著既仲ok. 咁呢個炎, 我就去買大d鬆身d架啦, 唔使大牌子野, 喺新墟買. livia話用墊唔好, 都焗住, 咁換褲密d囉.
8月9 今日去湖康做第二之血糖test, 樽野無咁暖無咁易入口, 都係指定時間飲晒, 跟住瞓下又呆等抽血. 應該都唔會超標.
8月11 第4次亦係最後既醫院座, 內容係嬰兒餵哺. 醫院提倡母乳餵哺, 所以講好多母乳好處, 餵奶姿勢都有講,又有片. 我一早決定餵母乳, 奶粉一罐都無準備! 但我家姐細妹不時問我買邊隻奶粉, 唔多鼓勵母乳咁. 我跟他說我個人夠硬頸, 我有信心餵到奶, 就算點辛苦都會撐住!
8月13 跟進之前入院同產檢, 醫生話上次種菌都驗唔到野, 無再出血無痛就當一般尿道炎case. 呢個第一次檢查時見既醫生, 答野好廣泛, 所以我問幾樣佢答左就算, 唔追問. 宮縮開始出現, 唔好按肚咁多喎.
8月18 今日就係約左好耐, 兩邊家人正式食餐飯(without my dad), 一早落訂屯門間稻香一圍歡聚宴. 一早我出發去碼頭接船, 跟住喺附近食lunch, 行陣中上環, 跟住坐叮叮去cwb再行, 差唔多時間諗住坐巴士去灣仔碼頭轉巴士去屯門啦, 點知灣仔塞車, 15分鐘車程變左triple, 入到屯門直去酒樓無上樓坐. 好彩有d細路喺度, 講下呢個b果個b, 氣氛就無咁悶. 圍菜都唔菜, 最差係燒雞咸d. 之後大家上左屋企坐幾個字先去坐車返澳門. 食過呢, 總算鬆口氣, 咁樣就成了親家.
8月19 一早起物出席第一個公立醫院以外既產前講座---friso育嬰技巧及營養須知. 今次得我一個人去.
登記之後, 睇過1媽媽blog知道大概講乜同有咩贈品.去到見到好多大肚人! 登記完後, 每位孕婦有一份file內有今次講座相關資訊, 那就不用抄notes, 小食2包, 當然有佢地sell products/公司image既單張. 招呼唔錯, 水以外還沖定媽媽奶畀你試, 我邊聽邊睇ppt邊食自攜麵包. 內容比公立醫院播足10年既短片吸引, 資訊豐富, 又有即場示範同bb沖涼換片, 2小時好快完.
填完問卷交回大會就送個大袋, 內有口水肩, 愛心育兒小百科書同媽媽奶粉方便裝2盒共20包! 都幾重下. 我既感想係: 大公司以本傷人, 收買人心.
lunch約了愛小姐同佢老公於菓一道食飯, lunch set唔錯, 啱我胃口. 之後聊天聊了很久, 因為年多無見, 而大家又有新轉變 haha
坐咁耐要舒展對腳, 過去海港城睇果100個多啦A夢, 超多人!!! 太陽又曬, 行一半路落去都出晒汗, 之後折返海港城直去西鐵站回家, 今次無人讓位, 可能我倚住車門側玻璃, 叫唔到我掛...
8月26 前幾天friso打黎話有個學習班, 可以用公仔試沖涼換片既, 咁有得實習當然比齋聽好好多, 就報名了, 地點於荃灣愉景新城既屈記內.
講者係上次talk個姑娘, 基本上佢講既同果日talk差唔多, 但多左d powerpoint資料. 對bb睡姿, 大便式樣, 扭計心態有d概念. 跟住就示範同bb除衫, 沖涼, 著衫同包被和抱初生b姿勢. 原來第一個月bb適應緊外面世界, 除掃風沖涼, 其他時都"包被"會畀佢安全感, 好似仲喺母體內.我倆輪流試, 試完就對同bb沖涼有點信心了.
又係填完問卷領禮品. 今次送大塊紗巾(當包被用)+2包媽媽奶+懷孕餐單, 都實用.上堂休息都有派水同生果bar.
之後喺愉景睇bb店搵新式環保尿布, 得2個牌子. 送別他後去千色店行個圈, 臨近開學, 好多野有sale但bb用品除衣服外, 其他都無折. 超!
8月28 本來跟qpmj食queenie相約生日飯於8月16, 但當天打風, re-schedule今晚, 去尖咀食韓菜. 食物ok, 價錢就比較貴. 我個肚都8個月了, 身形變化不大, 手擘不粗, 係肚子幾大, 即是bb吸收啦, good! 話我上圍升了, 當然要啦! 唔係點餵奶呀~~今次大家好似交換東西咁, 你畀袋野, 我又送d野. 多謝queenie既奶樽, minnie既鳳梨酥. 之後食甜品, 叫了雪花冰, 超過$35既冰, 我唔覺抵, 不過而家唔食多凍野, 幾個人share感覺唔錯.
8月30 今天放工見天氣唔算熱, 就行路去灣仔搭邨巴, 舒展下行氣活血, 因為感覺這星期小腿有點緊. 就在灣仔街市前的路遇到舊朋友E, 多年不見了, 我一眼認出, 而她就要望多望我. 哈. 我即告知現況, 她還以為我在澳門工作...(遲些日子就會的) 閒聊一陣就說電聯再約見面, 希望bb出世會見啦.
9月2 今日跟他一齊去雅培講座, 揀11-2果場, 都幾多人, 又係入場有媽媽試飲. 講座有2part, 但好似第一part悶到超時就cut第二part, 第2part係兒科醫生講bb常見病症同點處理, 講者好幽默, 內容實用. 之後過隔離互動區, 有示範用揹帶, 放bb落bb車, 換尿片, 填form就有禮品, 係迪迪尼果度無去, 無興趣佢d教材. 事前見有blog去過呢個talk, 會送指甲器, 我就正想要呢樣! 其他禮品仲有初生尿片, 書仔, 鞋仔, 口水肩, 媽媽奶粉sample, 襪仔, 濕紙巾同coupons. 真係又一"以本傷人"講座.
之後本來約上次放工遇到既舊朋友, 但講座完, 行去食lunch個人已攰又熱, 所以打畀佢cancel再約. 跟住送他去尖沙坐船就回家.
9月6 今日有個唔識既手機no.打左2次我都聽唔到. 到夜晚又打黎, 我原先都估係放租樓既人, 果然! 傾左幾句, 可以星期天中午去睇樓, 3房2廳比理想多1間房自然價錢又多d, 不過都係睇左先決定. 之前另1個單位要14號先call得佢睇有無人租左, 咁搶手...
9月9 選舉 -- 近年都無去投票選區議員, 今次係立法會, 加上梁生登基前後hk變得好亂, 都要出黎選返d好入會發聲. 一早諗好新界西投余team, 超級議席就無咩好揀, 涂生好過白姐姐, 何肥仁啦. 第日既公布係余小姐唔夠數上唔到...
9月12 約了舊同事出來, 一年無見一次, 上一次係2年前其中一個結婚, 大家見我肚都知咩事, 哈哈. 結左婚果個既太太同我差唔多預產期, 大家聊bb, 工作呀. 我都係想生前見d朋友, update佢地我既status. 下次, 係下年, hk定macao, 好難料...
9月15-17 星期五晚入屯門無即刻回家, 行下附近搵細地產舖同睇有無貼街招租樓, 留左電話. 近10點行到大興果邊仲有地產未收舖, 咁問下啦, 咁啱有個短租盤, 可以明天睇. 星期六食完lunch就問屋企附近既地產, 都無乜租2個月既, 要問業主肯唔肯. 咁就去大興睇翠林花園, 單位好舊, 無傢俬, 兩房之間夾個衣櫃令房更細, 唔啱. 之後又行行行, 去埋市中心馬會果邊d唐樓舊樓, 仲問埋村屋, 都係無心水無得睇. 後尾大興地產果邊話啱啱有個新放短租, 咁即刻過去睇大興花園. 入到去, 比之前睇既四正光猛, 開放式廚房, 有個雪櫃. 本來我想再諗一諗, 叫媽黎睇, 但他話好難搵到短租, 呢度唔錯, 搬d野入黎可以即租, 而agent又話有幾個等住睇, 有個客都係好急想短租. 於是再認真d check野, 想業主整整幾度地方. 睇完就去agent度搞臨租同落訂, 嘩一坐就2小時, 餓死我喇!!!呢次係我地第一次租屋.
星期日無乜消息, 我地打返去先話約4點去單位度同業主見面同講執漏既野, 點知等好耐無人, 後黎個業主太太自己去去睇, 我地就返agent簽埋正租約同畀balance,  但一日業主未簽返張約都唔算數架嘛.食完dinner送他走前再打去問status,業主未放工黎唔到簽約喎, 會再催佢. 到9點半agent打黎話業主簽好約, 叫我去補簽野,嘩咁夜, 我話我沖晒涼就瞓. 本來agent話佢過黎樓下, 但講多幾講, 張約係聽日deadline, 咁我放工過去簽同畀commission囉.
好啦, 我放工過到舖係8點前, 但個agent原來放假, 交畀另一人跟, 個人又唔多清楚key qty, 最後我都畀左commission同攞正約走, 當時過左9點...總算搞掂個單位, 租2個月, 放心好多.
9月19 是晚去鰂魚涌聽惠氏講座, 明明睇左邊個叮叮站近, 但confuse站既次序, 落早一個站又向後行, 過2個站唔對路就問人, 用多左時間腳力同汗水先到目的地. 好彩, 今次talk內容ok係營養方面, 禮品又唔差, 有媽媽奶, bb沖涼液sample, 英文songs書+vcd, 研圖貼紙,  圖書都係畀6+m. 坐返叮叮去灣仔轉巴士回家, 都唔算好攰.
9月22 lunch去元朗meet qpmj食預祝生日飯, 餐廳食物ok啦,西梅汁都唔似, 甜品唔錯, 但太僻了,未必再來. update左近況, josephine咁快搵到工, 勁! minnie送我鴨仔尿兜, 謝謝! 我見親佢地都有好消息講, 今次係搵到短租居所, 呢個大煩惱終於消失了! 但無傢俬係另一小問題...
9月23 約左第一份工既舊同事喺the one飲茶, 他就幫新居大清潔. 食了2小時, 每個fd見我咁身形都嚇一跳, 哈哈, 我旅行結婚同就生b一次過今日通知! 有個fd唔舒服無黎到, 咁佢唔好彩. 其串一個係我舊老細, 佢話知我結左婚同陀b都好高興, 我心裡都多謝佢既. 散band後便坐巴士回新居, 乾淨左, 不過都發現睇樓時睇唔到既缺點, 如廁所滴水(好細滴).
9月24-25 星期一係例行產檢, 男醫生, 觸診摸到bb頭向下, 差2日就36週, 所以都可以話bb既position定左. 朝早喺公司時feel到個肚有異動, 唔通bb知檢查, 所以"轉定頭"? 但以呢個post所感覺既胎動, 同呢2weeks既差唔多, 唔通bb好多時都頭向下? 檢查完睇牙醫, 有d牙肉腫痛, 係妊娠牙痛, 產期尾段唔可以洗牙, 坐完月先黎做.
星期二準時到屯院做B鏈test, 好似我做咁, 入去房姑娘用棉花棒取樣本就搞掂, 9點8出門, 11點前回到家, 最快捷係呢次! 回家休息一陣再食lunch先返工. 我妹個女(8個月)過左黎, 一落到膠地墊就爬埋去我家姐個女(18個月)度, 攬住佢, 又錫又叫, 好似女子摔角! 係咪當表姊係公仔呀? 可惜個大既無力招架...
9月26, 28 這2晚都ot, 星期五仲搞到9點8先走, 又係最後果個閂門, 無計, 想下星期輕鬆做handover同準時收工, 辛苦2晚啫, 好快放產假啦~~
坐叮叮meet他時, 遇見就黎last day同事同舊同事, 等巴士等左第3架有好多位, 總算我運氣不差.
9月29, 30 這個週末就是搬東西和拜神. 基本上搞掂7788, 只欠些少常用品, 都可以求其入住架喇. 第時真正搬屋當然買同搬多d, 令長住既屋有"家"感覺, 而家粗住啫~ 攰係攰d, 當做運動, 同埋我想10月前搞好搬東西, 佢一星期先過黎, 今week唔做下星期我就覺遲.
媽選十五黎拜神, 因為房已經有東西, 四角就以用廳既四角, 又要生果又要衣紙...都搞左個幾鐘! 之後去市中心睇下野同格下價, 過2日先買探耳器. 中午時用手洗了bb紗布,出院衫, 包被, 親力親為為bb做點,一感覺唔錯 ^^
到而家唔少人仲話我係陀仔, 個肚好尖...點解我個肚會咁尖? 腰短?? 脂肪唔夠???
10月1 明天要返工, 個補假會用黎12月19, 咁之後我復工, 他長假期就湊bb. 過了明天, bb就9個月大了! 我覺得佢大概2星期後出黎見我地 ^_^
10月 3 唉, 居然要OT...最後一次!
10月5 他收到msg, 我個macao居留申請終於批出! 咁我生左坐完月去打手指模, 拎張申請身份證就可以喺果邊搵工. 連埋9月尾成功將捷克結婚證書轉移到macao record, 第年續居留期就easy d! yeah~~
10月8 下午去產檢, 醫生話B鏈test無問題, bb頭仔入左胎盤些少, 但未入晒, 好難預計幾時生得. 我話有時小便有點痛, 佢就安排驗尿, 但我無貨, 又忘記拎水, 磨成個鐘都係得dd, 結果, 要問姑娘畀過新既試驗樽, 回家搞, 星期三放產假先拎過黎啦.
10月9 mgr喺公司5週年加上預祝我生產成功喎, 去左食韓式lunch, thanks~執下野, 又聽咩強積金半自由行講座, 又有同事請食散水泡芙, 時好快過. 不過臨尾醒起差一份野未做, 拿拿臨搞, 6點半離開公司. 2個月後見喇, 同事們~~
10月10至12 好彩屋企有d細路喺度, 放假都唔算悶. 呢幾日都係瞓得夠, 洗埋d bb野 (仲收到奶粉公司既小手套, 真係乜都齊), 執衫同其他野. 最後衝刺呀!
係時候practice下抱b, 餵奶, 掃風, 同b沖涼和用包被既姿勢~~
bb, we are ready!

0609-12釡山遊照

為未來新生活而幹的事(上)

旅行結婚是第一步. 跟著就是決定何時公開消息給家人, 何時移居澳門, 何時真正組織一個家...

本來, 有2個時機可以公開--11年聖誕, 12年農曆新年. 最後, 都是還原最初想法,懷孕了才行動, 那便可免卻"擺酒"這些煩人花錢事. hehe

時序:-

3月3買了棒棒, 翌早試驗, 終於confirm成功了!覺得"係"時感覺腰酸易攰, 就是2月尾無乜動靜以為是假象, 今次有證明就放心了^^

(排卵期計算是比較有效)

3月6他跟家人說了我們的事, 發現有人早知而不宣, 待我們自行報告.

(這天是他外婆於農曆年後過身的"頭七", 他家100日內不能來我家)

3月7到我了. 做完facial回家, 跟他用同一開場白: 煮食, 告訴了媽媽...後來, 家姐也知曉.

接下來, 找西醫出信, 到母嬰院登記.

(這天是我妹生日, 不過, 我家現只記bb的生日, haha) 

3月10喺澳門剪髮, 由長長秀髮變成冬菇學生妹, 方便打理, 亦都免除日後頭髮養份不足而變白.

3月13在屋企商場找到有驗孕服務的西醫, 通常我感冒都會找他. 只需留小便, 很快便說我懷孕了, 隨即有封確認信, 就這樣付了hkd220 (是因為要求見醫生嗎?), 真貴.

3月15跟mgr說遲一點返工, 去了屯門湖康登記. 嘩, 第一次檢查要4月26日, 個幾月後咁耐

3月22要到屯醫聽唐氏綜合症. 15日去登記到16日還未有機會告訴mgr. 後來放工不好意思的樣子給她遞上醫生信, 又說遲下要請假睇醫生...她都算對我唔差.

暫時, 7個月後安排有點眉目, 日後有否未知數就要見步行步了.

現時身體: 第8週, 走路跟平常有點不同, 行動慢了點, 吃東西不能太多, 會滯住, 常有"噯"氣, 易肚餓, 明明肚餓但聞到餸味又無胃口, 喜食濃味食物, 咸濕涼菓.

媽同妹講左, 佢畀食剩既維他命補充劑同魚油. 謝謝! 佢做左人母, 睇得出個人有d轉變.

家姐細妹都話要做早孕期唐氏綜合症test, 咁打去佢地介紹既醫生, 一個要收$1500首次檢查費另加test costs; 一個book唔到期. 自己上網搵到cwb有個女醫生幾好口碑, 打去問, 姑娘態度又好, $1600收費約4月20做, 仲約埋6月中照結構$1500. 安心d

3月31我父母跟他父母首次見面飲茶, 氣氛算ok, 不過講到我們現在要結緍, 如何擺酒見親屬和日後工作生活事宜, 我們就有微言, 因為早已告知我們想法.

3-4月的週末, 主要都跟他的家人親屬食飯介紹我, 食一圍圍菜, 真的有點厭, 但這是老人家意思嘛.

4月4, 踏入第11週, 喺第10週時, 唔知係咪食少左飯量, 開始少食多餐, 個肚無咁頂仲有時feel唔到添. 今日攞回鄉咭, 之後食左個酸辣湯米線, 唔係辣, 唔成日食, 應該對bb無影響.

4月7凌晨終於用fb msg & blog公佈結婚的事, 看了她們的留言心裡是感動的. 不過, 可能有了阿b既影響, 開始到現在心情都係好平穩, 比平時看開, 就算有不如意事, 很快就平靜. 這個改變是好事, 話唔定阿b擁有內歛性格~

算是約定426跟大家dinner. 結婚這麼遲才通知, 到時即會公佈懷孕事作補償, 她們應該不會意外的, haha

現在, 我只希望唐氏test過關, 因為我真不想bb有此症, 萬一有事, 我當會放棄...因為, 我年紀不小, 若孩子有問題, 我不能照顧一世, 我亦不想孩子在這亂糟糟的世界出世而無獨立生存能力.

4月20到診所, 醫生頗細心, utlrasound照到的地方都會說是那一部份. 她說頸皮部位薄, 應該不會高風險. 她還說size跟週數相若.

4月22終於睇西醫, 咳左幾日,今日聲都變所以去. 醫生開d輕一點劑量, 但我都怕怕地驚影響bb, 上網check每隻藥成份, hold住無食.

4月23診所來電, 告知我的風險ratio低, 我就放心了, 之後會寄上報告來我家.

飲左一啖咳水就即刻個人好wing, 之後唔再食藥lu, 靠飲多d水同早點瞓.

4月26首次到母嬰院, 他請假陪我. 那星期我們有點意見不合, 大家見面都盡量不提. 醫生說我體重過輕, 比未懷孕時還輕. 的確, 我食慾不振又感冒.

晚上, 跟朋友qpmj見面了, 去了間德國餐應, 但招牌咸豬手不算很美味, 都是在歐洲吃的正!

很多謝她們的禮物和祝賀, 沒想到她們聽到我說有孕會出現surprise表情. 正所謂"想要就趁早生", 我也不小了,努力3個月就bingo了, 即是身體狀況唔錯, 可以好好照顧bb.

踏入5月, 可能果日公司無水, 我恃住仲有力,想去換水(由底引水上那種水機), 畀mgr見到仲話我, 咁我就返位坐唔理. 之後, 我d同事就好似"知道"喇.其實dept既應該feel到, 因為我部門冷氣凍, 日日著外套遮晒成個body.

另外, 他在澳的身份都更改左, 由S變成M. 跟住搞婚姻登記轉移, 將捷克婚姻轉到澳門, 咁日後有關婚姻野都可以用澳門張cert. otherwise, 每次要搵捷克agent做certified copy, 花錢又花時間!

5月10母嬰院叫我去做血糖測試, 俗稱飲糖水, 一早8點9到, 已經有唔少孕婦飲完等下一步. 我抽完血拎我果支糖水, 都唔算好大支, 暖暖地確實易入口, 10mins內吹完. 呆等個幾鐘再抽血就走得.

5月23第2次到母嬰院checkup. 喺公司同班黎trainning 既大連outsourcing team食最後一餐, Outback d野差左, 樣樣都咸. 食到1點10走, 但等到2點962先到, 去到母嬰院3點3多, 等一個個程序下我又要求見醫生, 結果我係最後一個人走...

因為我有時有耳鳴, 坐車焗想暈, 標冷汗, 身體部部出現一些變化, 所以想問清楚醫係咪由懷孕而起, 佢講算係, 總之無聾唔痛唔出血就無事. 哦, 唔該晒!

婚姻轉移要我交無結婚紀錄證明書(寡佬證), 要近半年既, check到星期六婚姻登記處可以做, 6月2拿拿淋去屯門果間搞, 由於去年搞過有紀錄, 等15mins就掂, 無左千幾元!

掙扎多時, 最後決定出發6月9-12去韓國釡山旅行! 2次checkup都ok, 我既食慾又正常返, 體重上升緊. 想起日後有一段時間不能外旅, 就趁這幾天好好休息充電(但我們是凌晨機去凌晨返!). 回來再搞bb同搬屋事.

在釡山, 我們去體驗文化, 郊遊, 食東西, shopping, 還買了送他的生日禮物--Lego 復仇者聯盟, 真滿足~ 人手有限, 我們買每樣東西qty都係1, 真係少.

6月15再次到何醫生做超聲波結構檢查, 一直以為係4D, 原來2D, 不過都ok, 知道bb發展就得. 今次知道性別是女(有人舉起勝利姿勢, 超!), 我不明白, 屋企人都以為男, 而我個肚又尖, 點解女? 無錯, 皮膚比從前好, 面色飽滿精神, 無嘔無作悶, 就是陀女的徵兆? anyway, 一秒既失望過去, 就諗我要我女兒堅強獨立. 醫生照了數次腦部, 說腦水接近臨界的1cm, 寫了信畀我去屯門醫院約婦科, 當時真有點擔心! 又令我煩惱起來, 除了唐氏, 原來整個孕期以至出世後, bb好多事都令父母擔心. 我真係要有心理準備, 不能過於杞人憂天.

上網check了有關腦室腦水資料, 都說未過臨界都安全, 而且還有一半孕期, 腦部發展還在變.

6月19去了屯門醫院登記, 之後來電就可以照ultrasound.

6月20照了, 醫生話今日bb腦室兩邊7mm, 無上星期咁大(有一點是公立跟私家的儀器不同款), 不過, 佢都畀多個期我黎照多次跟進, 7/18.

6月21再次跟qpmj聚會, 真巧, 今次有bb性別可公佈. 是晚食上海菜. 她們都說我肚凸凸了, 對, 現在就是像樣的孕婦!

6月22見過livia,告訴她腦室的事,她說24週後不胎兒有事不能不要, 當下心有點忐忑. 她信私家醫生多些, 建議另找醫生再做結構. 但, 既然我那位醫生寫了referral信去政府, 政府檢查又無異樣, 我們就順著這進展吧.始終, 不是大過1cm(苦笑).

7月4去母嬰院檢查, 原來約左去屯門醫院可以唔使黎. 呢個week都係為著公司埋數事煩, 班ourtsource公司真係好唔掂, 有時我仲要喺屋企睇email到凌晨!日日炳佢地 !! 今天邊食lunchbox邊check到2點先走,3點9到, 都係例行式, 所以檢查正常.

7月5 10點到屯門醫日間中心排隊, 開頭又係度體重, 量血壓, 驗小便. 跟住等見醫生....等左成個幾鐘, 就係見左醫生10分鐘, 聽bb心跳正常. 然後佢提我再去照聲波follow up, 佢話儀器輔助性質, 唔係百份百準, 而家照話個腦室大左d, 但都唔大問題, 繼續跟進囉. 同埋有d野未生出黎都唔知...唉, 等我肚餓係呢幾句, 個醫生係咪見太多人麻木晒?

算啦, 我而家都平伏左, 會繼續養胎等bb出世健健康康既!

7月7 終於喺澳門拜左祖先, 我叫做"入左門", 呢個儀式排左好耐期下...

7月8 終於去到游水, 舒展筋骨, 鬆晒~~

我們本來想放產假時就租屋住一個月, 直至bb攞到出世紙和出入境文件可以過澳門, 那我繼續在澳門坐月. 出面租屋只一個月是很難, 那轉plan租住宅式酒店吧. 6月24去天水圍問一問和看示範, 當時才知10月後不再有住宅式出租, 會轉回日租每晚約千多元. 於是, 我們再搵村屋, 租價相宜, 不知道有否1個月租期, 要問問. 另, 我們還留意網上一些短租屋, 希望有1個月租期. 

現時狀況, 原來b女早於4月時已有胎動, 但我以為自己腸/胃氣, 到現在她踢得有力. 肚子不算很大, 但很多衣服穿不下了. 每天, 除3主餐, 我只多吃生果, 一點麵飽, 一點低salt小食. 水和fiber很重要, 我食很多菜. 而每日放工我都是步行到灣仔搭邨巴, 這可幫助消除腳腫. 所以我體型還不胖, 只面部由削變有點方, 腰還有一點點呢~另, 體溫自20週左右上升, 晚晚要開冷氣瞓, 坐勁冷邨巴都唔使著外套! 腰酸背痛自然有,瞓覺要側身瞓, 晚晚起碼起床一次清夜尿. 體重由43kg升至47.5kg, on average. 

報告完畢

i m married on 20111118!

以下始於2011年夏天, 記下兩個人秘密進行的行動和個人感受...

aug 5晚, 在天台, 他領著我的手指向天上月亮, 然後拿出求婚介指戴上我的手指, 跟著對我說那句話. 我先覺突然, 很快回復平靜, 欣然答好!
原來他記著我想旅行結婚, 當決定11月旅行時, 便盤算地點在澳洲還是捷克. 最後選在捷克, 該國歡迎外國人到來結婚.
我是個急性子, 說好了要做便要實行. 第一二個星期看別人blog如何申請文件, 詢問當地wedding planner. 在他的葡國Passport跟澳門出世的文件問題煩了一陣子, 跟著是香港申請的文件所需時間都比澳門長一倍, 費用更多十倍! 天啊, 為什麼!??!
我一直記著要10月前寄文件給wedding planner, 前幾天一直著緊和擔心. 現在release一點, 想通可以最遲10月10寄出. 另我忍不住email問其他planner confirm是否要畀某份文件, 發現有一間比現在所選的回覆快同blog友都推介, 便心動想轉軚. 不過, 都要這公司book到我們所想的日子才可cancel現在的.

過了一星期的sep4晚
aug29真係晨咁早7點3出門, 為著一早去灣仔政府搞所謂cert of registered particulars, bloggers話要成個月. 8點45分開門, 以為8點半到排一陣, 點知原來好多都趁快去搞政府野, 見到好多非港人排身份證, 點解佢地有資格....@@ 好彩我申請呢樣無人排, 係第一個. 由職員check form, 問我咩原因申請, 我補封書面信要求加快辦理到交錢, 不需半小時, 好過搞無結婚證明!希望文件9月尾可以到手再高院加簽, 趕及10月中前寄出啦~
第一個planner服務唔合我地要求, 所以最後決定換公司, 轉軚跟我睇個blog推介既EW公司. 位小姐果然覆得快, 又畀到意見, 又有sample docs睇, 又會幫check macao人要求文件, 公司收費都ok...
原來化妝set頭最貴架!!成幾千... 而家我地搵過平D攝影師, EW開頭介紹果D係專業, 但我地只要影一陣相留紀念, 唔使pre-wedding. 平d既攝影師啱影完既結婚相都唔差, package仲包30張printed相, ok啦~
服裝同介指仲研究中, accessories就唔諗住. 婚紗唔諗. 我地逛過high-class如"阿媽黎"禮服, cK連身裙, 中等價牌子裙到common zara, h&m, 試左幾款, 都係白色似結婚用. 本來我想揀娃娃裝for我呢d無料人, 但d款簡單得滯, 影相效果普通. 我試h&m條白裙有大花印, 影出黎幾好, 夜晚著佢幾高貴下...
介指方面, 有白金, K金, 鑽石揀, 有款喺周金金都唔錯, 但佢無印象, 即係再睇其他啦...

Sep11晚
新聞講既係美國911同日本311...
好努力搵布拉格酒店, 同agent傾野, 搵裙搵西裝, 再睇介指, 度行程, 歐洲車費真係貴!!
而家定好落機行布拉格, 坐夜車去波蘭克拉科夫, 翌日參觀集中營, 再行週邊, 第4天坐夜車去德國柏林, 第6天下午食完飯就坐車回布拉格. 每程火車要eur30 or above, 希望到時有promo. 第7天去政府機構搞手續, 下午應該試妝, 第9就大日子 1400~~夜晚去間有情調餐廳慶祝! 之後1日去埋郊區sightseeing同shopping, 到星期日下午就要坐飛機離開了...
本來度好h&m果件, 但試畀佢睇又唔係好好靚, 仲有時間再度一度先...h&m有件西裝都唔錯, 畀佢諗下點match褲, 唔使咁急買定既.
我地仲想申請新咭換迎新禮品行李喼, 話晒使唔少錢買呢樣果樣, 換d野感覺抵d~~
介指方面, 周x福果d設計啱我地, 唔要石, 揀d時款既, 磨沙果d戴上手mature la, 有石仲老氣...
呢個星期尾以為係好消息euro跌, 入左d貨啦, 點知星期六睇再趺多d. 真係趁呢個時機畀agent deposit同再入貨!

Sep19晚
9/12中秋早放, 未有把握時機趁低入euro, 之後歐盟搵中國美國幫手就push返個rate...但今日又話現危機又跌返轉頭, 股市更無眼睇...上星期deposit 過左數, agent仲未畀返佢都簽好既contract, 不過見佢send budget and schedule黎都ok.
尋晚喺tripadvisor睇prague hotel rating, 揀黎揀去決定遠些少喺領事館地區既Hotel Green Lobster, 睇相幾有honeymood feel同comments不俗又buffet breakfast同airport shuttle bus.

介指等我申請交銀信用咭先買, 簽$3000有$300回贈唔錯啦! 之前想換喼, 但佢無hkid無資格申請香港credit card :(
剛剛既weekend去左澳門, 無意中喺三盞燈某商場有間珠海婚紗攝影分店租售晚裝姊妹裙, 試過幾款, 有件女神feel唔錯但我地係11月中, 披披肩就睇唔到特色; 有件A字款都簡潔, 要訂造mop300左右, 下星期有新款再去睇就要做決定喇.
bf帶我去佢造過套西裝既舖, 回家睇返之前西裝, 普普通通啦, 師傅話可以攞款黎造, 手工好既咁就掂! 因為我唔想嘥太多錢喺著一次就算既野, 但佢就想一生人一次, 喺造衫上係有d分岐. 其實我都明, 咁我造衫係自己決定, 佢任我定, 咁我都尊重佢啦, 造得好好睇睇呀~~
我諗過攞埋之前既姊妹裙去果邊, 邊旅行邊自拍, 好似果個相機廣告, 哈哈!

Sep28晚
近排為著婚事晚晚12點幾1點瞓, 週末瞓返多d抖下咁. 今朝個人就唔係好頂得順, 可能加埋黎m. 返工前去攞登記事項, 行返公司同事專登撞我一下, 我黑面...lunch早d出去金鐘搞加簽, 順便拎返中秋果2份.10月3應該可以寄去捷克, 咁就真係放下心頭一大石~
啱啱個週末再去果間租售店睇新貨, 好似比上星期既差, 都係出面款. 我地睇左一輪又討論, A字款係個表面design幾好, 但我著真係唔立體, 我矮小既應該分上下身咁show條腰先取長補短. 之後又試一件修腰好睇d又係我style但質料薄手工普通唔啱. 試一個斜肩low cut有花花喺斜肩帶短裙, 效果唔錯, 訂白色應該似簡約結婚裝. 結果就訂左呢款, 鬆一口氣~~~由晏睇到晚, 仲行晒果個area先決定去返舖頭再試, d婚紗真係好重, 我唔想carry囉.
佢一早喺網搵西裝, print埋出黎, 拎去造開果間, mop980禮服連褲, 10月頭睇半成品, 10月中完成, 比我件仲早收貨...
之前睇中既酒店無即時用信用咭做保證booking, 星期一check返就升價! (應該係越早訂越多discount, 而家咪少左%) 果刻睇到個人好激氣, eur50/nite又有早餐又honeymoon feel既房得呢間咋...咁星期二拿拿淋揀好就決定訂Marriott Executive Apartments-Longin Center, 不包早餐但有fitness, sauna rooms, 房間有廚房, 每層有洗衣設備, 房有37 square metres, 夠晒當日set頭化粧!
本來book個人經常為亞洲人化粧, 睇相都唔錯, 但hair+makeup+trial收費差唔多hkd3000+, agent話係mid-range化粧師...我睇上網香港一日包幾款由早到晚先收呢d價, 得1個造型畀咁多真係唔抵囉. agent有建議搵平d, 雖然只係減幾百港紙, 但我既要求簡單, 應該搞得掂既. 諗好左唔heavy粧, 前額紮辮子圍側再束馬尾, 辮子可以令頭髮睇落厚d嘛. 成個look唔似初冬feel.
睇左網上好多花球相, 定好3隻色--紫roses, 白繡球花, 薰衣草, 無咩相有齊呢3種, 總之畀d近色相畀agent搞.
而家差介指, 婚前檢查, 寄文件, 訂其他地方住宿就掂, 加油!

Oct 5中午
29/9打風, 咁多左時間searching. 去到夜晚攞換左既euro睇, eeeeeee同個表寫有出入, 差eur400!於是喺房搵啦, 之前中秋假執過一次, 唔通夾喺d信度?無呀, 唔見呀!!之前攞d舊信/紙拎返公司碎紙, 唔會...但記唔起當日放錢收錢經過@_@
星期五收夜, 同佢食完飯就再搵, 都係無發現. 咁諗可能喺佢家, 佢之後都搵過, 我尋晚(oct4)徹底咁逐度搵, 逐張紙揭都唔見, 頭先睇埋床下底, eur400你去左邊呀!!??!!?!?!!!!!!!!!! 欲器無淚 T_T
講返進度
前日佢澳門仲係假期, 一早幫我去金鐘高等法院加簽攞文件, 返黎cwb寄speedpost, 再去問婚前檢, book呢間毅力cwb office星期六上去, 我諗緊加唔加錢做懷孕前檢查...
上網睇左一輪, 克拉科夫同柏林既酒店都訂好, 柏林果間純粹近火車站求其住一晚算, 2度既錢比布拉格低唔係好多, 但房間size細一截, 因為去到克拉科夫剛好喺獨立日, 好多房full左, 而德國係西歐強國, 房價唔使講啦...
果間交銀, 交信用咭application時, 職員目及一目及就算, 星期一先收信話要補野同畀電話contact, 星期二fax追電話問佢cs, 呢間強國銀行既服務都算唔積極又古板, 我唔係貪佢$300回贈都唔想畀資料佢呀#_#

Oct 10晚
wedding planner覆左收到文件, 我又畀左揀好既既髮型, 花球款, 襟花款, 一齊都算度好~~ 所以呢個星期無email同planner來往 :P
星期六8號一早出發去銅鑼灣診所做婚前檢, 我捐慣血, 抽血無問題. 量體重我只有41kg, 有咁輕咩? 之後喺附近食晏, 逛街睇煲呔, 外套大褸, 白恤衫等, 最後喺上環永安買左灰粉色煲呔, 幾潮下, 影相效果應該幾搞野 ^_^
尋晚再睇火車價, check下有無加或仲平, 結果係近d日子會少discount, 就好似酒店咁! 豈有此理丫, 咁我地check好咪online purchase囉...
婚介仲等我果張交通咭, 今朝打黎再問我住宅電話/居住年期...妖! 而家好多人無裝家居電話啦! 我剔左同父母同住, 又唔係自己樓, 寫年期把鬼, 但都答佢. 個人把聲好內地feel, 都唔知幾時先肯批...真係頂你!

Oct 11晚
lunch去建行辦事, d服務都唔錯, 無中銀咁多人要等, 講解清晰. 點解間交行做張普通信用卡畀我都咁耐?!??!
返公司都2點3, 拿拿聲做野. 仲有時間check一check火車價有無變, 靈機一動check11/11柏林去布拉格要eur39/person, 哦, 咁我知喇, d票價係因應座位供應而定, 11/11係波蘭假期, 可能多人訂車位所以無最平eur29/person (2nd claass). 呢幾日會訂喇, 但仲未搵到網上邊度可以買布拉格去克拉科夫, 克拉科夫去柏林既火車票 :(
之前約左6點2上毅力補小便樣本, 順便預約懷孕前檢查, 我上去無晒人, 駐場姑娘問我今日做唔做埋抹片, 超聲波就聽日先check到時間, 咁黎到梗係做埋~~做呢d抹片真係幾尷尬又緊張, 有d痛, 我果度有d敏感, 有d血添...

Oct 16晚
星期四晚, 心碎...點解1d多年相安無事既野會被發現變質? 不能細說, 現在在我心底內, 我能信賴的, 只有他. 因此, 婚後計劃可能有變, 不過都係睇之後情形才下決定.
星期三朝我打去問進展, 交銀話就快出批核結果, 一般係4個星期先出到咭, 已經加快我個申請, 批到仲要等印咭喎. 明明我交form係保證14天, 點解變左4星期??!?!? 我想取消申請, 佢話就快有結果, 可以等出左先決定要唔要咭, 好, 我等埋呢個week. 到左星期四放工前收到交銀來電. 頂佢! 話批左, 會拎去整咭, 預一星期寄到. 我即刻話佢搞咁耐, 人地銀行好快2星期搞掂, 當初又話14天, 我話我要取消, 佢話出左結果唔取消得張咭, 前一日仲可以喎! 我就子彈咁炮轟佢尋日位女士唔係咁講, 我話明urgent, 9月21申請到而家仲未有咭, 我想用既錢唔使你地張咭啦, 你地職員講野個個唔同我好唔滿意唔想用你公司d咭!!!個人好驚話幫我問, 轉頭打畀我話對返d資料就cut得, 我補充問佢係咁會銷毀我d資料, 佢話係, 咁我話若第時收佢銀行宣傳品我就去銀行再嘈佢地!
當晚即去世貿周x福問有無貨, 格左澳門周x福, 男介香港平, 女介澳門抵, 所以我地分開買, 應慳則慳嘛~
星期六喺澳門行威尼斯, 睇中沙華一件圍頸外套, 新貨賣999(香港同價梗係澳門買!), 等佢翻細碼. 星期日去婚紗舖, 件白短裙造好, 試左要改兩側收緊, 睇落幾好, 新娘feel哈哈. 不過, 早前喺fd去fd wedding見到9成似, 質料可能唔同, 長短之分 :( 又唔緊要, 每個人著都唔同感覺既..

Oct 25晚
上上星期發生事延續成另一爛攤子, 我只想取回答應過的.
上星期六喺澳門拎返改好既裙同禮服, 裇衫同大褸都買左, 第一次買正價, 安慰既係mop兌hkd折讓3%, 當個折扣 ^^ 成幾袋野拎返家, 應該無咁既情況再出現!
星期一放工, 我喺cwb配埋佢既男介. 點解19號買女介, 20號先出love sale?!?!?!?男介有85折, 但個價比之前貴左$100 :( 跟住叫人刻字, 畀人講兩講又驚介指唔同左, 唔等一星期拎去廠做電腦刻, 即場人手刻, 手工真係...唉
總之, 文件搞好, 東西買好, 行程計劃好, 好想快d飛呀~~

Nov 8晚
這是旅行前單身前最後一篇了...
生日當天終於了結早前煩事. 今次無透露畀同事我生日日子, Lunch匆匆喺'意大利蕃茄'食完意粉再上cake, 去ua換生日coupon就算了. 一個人獨個感受 :)
29號跟他食補生日飯, 可是中午出現小風波. 我已經很努力去平靜, 從前說有不錯即時向對方道歉. 今次他這樣做我未能即時平復, 一路上還想很多...兩個人相處的學問真難學, 學無止境呢~~
一直盤算何時向mgr請假, 不放婚假就變成-ve balance. 最後打聽HR未有cert下可否提早申請, 回覆可以後補cert. 本來想4號friday畀mgr, 佢星期四話放假, 天意下各同事走晒淨我同佢, 拿拿淋交form, 佢好surprise又話海外旅行咁浪漫 ^^ 我答順便搞的. 哈哈
那晩約好queenie, phoebe&minnie補聯合生日飯, 氣氛Ok. 我其實想宣布, 但我呢方面比較含蓄, 還是說不出口...
而星期六去睇檢查報告, 我身體正常, 只是體重偏低, 德國麻疹抗體唔算多. 跟他研究不要補充注射. 心情不差下去探生下第2胎b仔既Livia. 佢對腳大左size, 生仔真係有影響母體! Lok lok仔又長高了, 笑容依然咁開朗 :) livia還追問我們何時結婚, 有人口快快話唔知道, 其實我想講出黎架..
早預料mgr會跟同事說我的好事. 今天同事借意向我打聽, 我認了. 我想低調, 所以越講越少. 總之我倆開心便夠了~旅行回來才恭喜多謝吧!
回來後, 還有很多事要辦, 旅行結婚只是一個開始, enjoy!!!