被票控亂過馬路T_T

真失魂...對面馬路有幾個警察, 我都照樣在紅燈無車情況過馬路, 就咁...被票控! 遲D收罰款通知...
我會唔會就此以後紅燈必停?o?
事發喺屯門蔡意橋站往卓爾居既馬路. 我果時諗緊野, 係見到對面有交警同"咖啡妹", 都閃過一刻做咩無車D人都企喺度, 但我已經過左.
個咖啡妹叫停我, 問我有無睇燈, 我話無, 叫我攞身份證...當時我仲以為係口頭警告.到佢問我地址, 我就問佢咩事, 佢話寄傳票, 我吓左, 咩呀??!?!?!? 佢就官腔話我亂過馬路要票控, 我咪問唔係有口頭警告咩, 又無路牌指示無亂過馬路, 佢舉例話咩無偷竊警告牌都有人偷, 偷左就係有罪, 我話佢唔應該攞嚴重罪同過馬路混為一談...擾攘一輪, 佢叫個交警黎又係講埋D官腔. 我又話個咖啡妹做野唔合程序, 叫停我無講票控就攞身份證同地址, 到我問先講.
最後我寫左地址, 無畀電話就走. 心諗若果之後返果條路仲見到佢地, 我就要問返個咖啡妹編號同姓名, 投訴執法程序. 不過, 1小時後佢地收左隊.
之後我聽到有途人師奶話有人咩被人罰咪罰, 畀左資料就好走, 理論咁多做乜. 我就唔想佢呢種心態, 罰左畀左錢你係咪會以後一世守規則? D宣傳都唔足夠, 同埋我同佢地理論時都係想問清楚程序, 但D警察們可能做得多, 交行貨. 唉~~
之後買支軟雪糕下度氣.